امــــــــــــــــــــــــــــي شعر خرافي

أمي الدنيا كلها وجنة الدنيا
امي العليه احسها وتاج عالعليه
أمي بروحي روح وعين جوه العين
امي الهوى النفسي ورية الروح
كَبل اجفوف اديها الكَلب من ابعيد
يتحول اجفوف ويلمس البيـــــــه
تصعد للشمس يوميه امي تروح
وصباح الخير امي تكَلي يوميــــه
اليعيد بالسنة لو مره لو مرتيــــن
وآنه لشوفه منها بألف عيديــــــــه
تمطرلي محنه بكل رضاها وياي
ومن تغتاض احسها تفيض حنية
تمشي امي اعله دربي تخاف من الشوك
وتبدل الشوكه اليه بورده جوريه
امي لخاطري سوت كَمر مخصوص
صاعت من شمسها الاذنه ترجيه
بيريه كَلت سمعتني اريد أولام
كّالت يمه كَلبي ايصير بيريه
تفرشلي جفنها بالمحنه افراش
وتغطيني برمشها شكبر خيمتها
وأذان امي استحاله يعرفه ياهو الجان
وأهي الجبد السما وصلت منارتها
ومن توكَف تصلي الكون بيها ايلوذ
ونجم الله نزل رصع عبايتها
ماتدعي النفسها بالدعاء اتكَول
ربي وليدي احفظه وهاي دعوتها
الام مدرسة وامي العزيزة اتكَوم
تلف كل المدارس ويه شيلتها
من اتأخر عليها ما تسد الباب
وتسولف سوالف بيه نظرتها
كل نكَلة جدم من عدها بالف احساب
وتلم اسنين عمري بنكَل خطوتها
وتصعد عالسطح من تدعي ارد ابخير
ولمن ارجع تضم امي كَصيبتها
ومن ارجع تضمني ابين اديها ابشوكَـ
واحس الكون ضمني بشوكَـ شبكَتها
من تحزنلي امي تسيل منها ادموع
ومن تفرحلي امي تسيل دمعتها
واذا مابات يمها وتدري بيه ابعيد
عيون الليل تسهر ويه سهرتها
وتنام الناس كلها والنجوم اتنام
ويطر الفجر وامي اعله كعدتها
مكانك خالي تندب من تشيل الزاد
وتثلم بالظنون وعدله خبزتها
يايمه شكلت جوعان لو شبعان
بدللول الحنيه تنادي حسرتها
ومن اتصب أكل تتلفت اعله الباب
وتردد بأسمي امي وتسد جوعتها
هزتني بكَلبها وذبت الكاروك
ولحد هاللحظة ارضع من محنتها
أمي اعظم تعاطف واعظم الايثار
وأمي اعظم قصيدة الدنيا كتبتها
شلت اجمل صور بجفوفي ما خليت
بس امي الحنونه بعيني صورتها
ابد متعيش سمجه بلايه ماي اتموت
وأنا ماعيش اموت بغير شوفتها