لبي..ايام سعدك ما تم الها
اريد انصب لروحي مأتم الها
واشوفك..هم تجي وتبجي عليه
لو مرة تمر مثل الشماته
وانا بنحرك ولك يا اسمر...شماته
علي مغرور كالولي..شماته
عشرتك...روحي صدك ما تملها
وقصحيح بشامتك تنغر عليه؟؟؟
لو تذكر رباي وياك...والعن
ولا تنغر على اللي بيك..والعين
افرض لو اسبك حيل...والعن
هم بغيض..ولك تزعل عليه؟؟؟
لو تعرفني احبك..واشتمنك
لأن منطي للواشي وشتمنك
اريد اليوم احضنك...واشتمّــنك
واشوفك...هم تذب روحك عليه
لو رأسا تكللي ارجوك...هدنه
وتعاندني وتريد النوب...هدنه
ولك والله العشك وياك...هدنه
مريض انه تعال اسأل عليه
وشوف شلون حالي من تسلني
ولكن...سيف صدك..من تسلني
الدمع يغلب جوابي...من تسلني
اضحك بالجذب...غصبن عليه
لأن ماريد اشوفك يوم... حزني
وتدري بسيف هجرك..ولك..حزني
كلبك انته وحدك الي...حازني
وحيازة وحمل سلمتك بيديه